A Xunta de Galicia e o Concello de Brión asinaron un convenio de colaboración para impulsar a execución de obras de mellora no CEIP Plurilingüe de Pedrouzos e no instituto da localidade.
O conselleiro de Educación, Ciencia, Universidades e FP, Román Rodríguez, e o alcalde brionés, Pablo Lago, asinaron na mañá deste martes o acordo, co que pretenden levar a cabo unha serie de actuacións nas infraestruturas educativas desta localidade da comarca compostelá, segundo trasladou a Xunta nunha nota de prensa.
O titular de Educación do Goberno galego destacou a importancia deste acordo como un exemplo de “colaboración interinstitucional” entre dúas administracións “que redundará en beneficio da comunidade educativa de Brión en particular e no conxunto dos seus cidadáns en xeral”.
Román Rodríguez aposta por esta liña de “traballo cooperativo” que permitirá “sacarlle o máximo aproveitamento e rendemento” ás infraestruturas financiadas con recursos públicos, como vai ser o caso do Colexio de Pedrouzos e do Instituto de Brión.
DETALLES DO ACORDO
No marco deste acordo, e froito desta colaboración institucional, o Goberno galego asumirá a redacción e aprobación do proxecto e a execución da obra de rehabilitación e, no seu caso, ampliación do Colexio CEIP Plurilingüe de Pedrouzos.
Así mesmo, a Xunta comprométese á desafectación do uso educativo dunha franxa de terreo do colexio de 200 metros cuadradados aproximadamente para que o Concello constrúa unha dársena de autobuses que mellore o servizo de transporte do alumnado.
No tocante ao Instituto IES de Brión, o Concello comprométese á redacción do proxecto e á execución da obra de cubrición dos laterais do patio cuberto, mentres que a Xunta facilitará o uso compartido do devandito patio por parte da administración local fose do horario lectivo.
