O delegado do Goberno en Galicia, Pedro Branco, e o alcalde de Boqueixón, Ovidio Rodeiro, celebraron, almorzando filloas, a declaración da Festa da Filloa de Lestedo como Festa de Interese Turístico Nacional (FITN).
Fixérono durante o acto de presentación da festividade como FITN, ao que tamén asistiu a subdelegada do Goberno na Coruña, María Rivas; o presidente da Asociación Cultural da Festa da Filloa de Lestedo, José Manuel Canabal, e filloeiras da zona.
Pedro Branco valorou a tradición popular que representa a festa e o propio nomeamento como FITN. Nas súas palabras, “este recoñecemento pon en valor o compromiso coa tradición dun pobo enteiro e tamén co seu progreso, algo que representa este título que acaban de recibir de mans do Goberno de España”.
Ademais, destacou o papel da veciñanza da parroquia e, en particular, dos seus filloeiras, “sen as que esta festa non podería saír adiante” e ás que felicitou.
