O alcalde de Ames, o socialista Blas García, puxo en valor a “valentía” e “a responsabilidade” que, ao seu xuízo, mostraron os seis edís do PSOE compostelán e defendeu o diálogo fronte ao “ordeno e mando”.
“Esta tarde os compañeiros e compañeiras do Grupo Municipal de Santiago mostraron a súa valentía, pero sobre todo a súa responsabilidade e o sentido común votando a favor dunha política de vivenda que xa defenderan cando foron goberno”, sostivo nunha mensaxe publicada no seu perfil da rede social ‘X’. O rexedor subliña que a “política real, a de verdade, faise desde o consenso, o diálogo e a responsabilidade” e “non desde o ordeno e mando con cartas e vídeos”.
“Que difícil é entender que na política hai que ser responsable e que non é un xogo de quítate ti para porme eu!“, asegura o alcalde en referencia ao conflito aberto no PSOE compostelán despois de que o seis edís desacatasen a orde da dirección local de absterse no voto da ordenanza que regula a comunicación das vivendas de uso turístico. Co apoio dos concelleiros socialistas, que agora se expoñen a medidas disciplinarias do partido, a medida saíu adiante.
