A Xunta de Galicia prevé poñer en servizo este verán, no mes de agosto, a senda peonil e ciclista que unirá a Estación Intermodal de Santiago de Compostela co Milladoiro, no concello de Ames. A actuación atópase xa na súa fase final e, segundo trasladou este venres a conselleira de Vivenda e Planificación de Infraestruturas, María Martínez Allegue, só restan “pequenos detalles” para completar os traballos.
A responsable autonómica desprazouse este venres a un dos puntos do percorrido para supervisar o avance das obras e salientar a importancia deste itinerario dentro do eixo de mobilidade sustentable que a Xunta está a desenvolver na capital galega. A conexión entre a Intermodal e O Milladoiro forma parte dun trazado máis amplo no que xa están operativos outros treitos, como o que comunica a estación coa contorna de San Caetano e o acceso ao Complexo Hospitalario Universitario de Santiago (CHUS).
En conxunto, este eixo sumará arredor de 6 quilómetros de percorrido, que, segundo os cálculos expostos pola conselleira, poderán cubrirse en bicicleta nuns 20 minutos. O itinerario parte de O Milladoiro e discorre pola contorna de Conxo, o Hospital de Conxo, diferentes parques urbanos, a zona do Restollal e Pontepedriña, ata enlazar coa Estación Intermodal.
A conselleira tamén se referiu ao treito que atravesa o ámbito do Banquete de Conxo, que continúa sen executarse. Martínez Allegue explicou que esta parte do proxecto permanece en suspenso “mentres non exista conformidade por parte do Concello”, polo que a súa posta en marcha queda pendente dese acordo entre administracións.
Durante a visita, Allegue puxo o foco nun dos elementos máis destacados da actuación: as pasarelas construídas ao longo do trazado. En total, a senda incorpora tres estruturas deste tipo para salvar diferentes puntos do percorrido e garantir a continuidade do itinerario peonil e ciclista.
A conselleira achegouse concretamente a dúas das tres pasarelas, situadas no ámbito do ramal de ligazón entre a AG-56 e a SC-20. Trátase de dúas estruturas executadas en madeira de piñeiro, cada unha delas con 32 metros de lonxitude, 4 metros de anchura de paso e un peso aproximado de 11 toneladas.
A terceira pasarela sitúase na contorna do antigo túnel ferroviario. Neste caso, foi construída en aceiro, conta con 21 metros de lonxitude e alcanza as 9 toneladas de peso. As tres estruturas chegaron xa montadas á zona de obra e foron colocadas mediante dous guindastres, nunha operación que permitiu deixalas instaladas nunha soa xornada.
