Os servizos de emerxencia liberaron este luns a unha persoa que quedara atrapada tras un choque frontal entre dous vehículos en Ames. Segundo informou o 112, o sinistro tivo lugar arredor das 16:40 no quilómetro 3 da estrada AC-544.
O sistema de emerxencia eCall activouse automaticamente ao producirse a colisión, notificando ao 112. Ademais, un dos alertadores comunicou que parecía haber unha persoa atrapada nun dos vehículos implicados.
A central de emerxencias mobilizou de inmediato aos equipos do 061, á Garda Civil de Tráfico, á Policía Local e ao Grupo de Voluntariado de Protección Civil de Ames. Tamén se solicitou a intervención do Grupo de Emerxencias Supramunicipal (GES) de Brión, así como dos Bombeiros de Santiago e Boiro.
Os integrantes do GES de Brión desprazáronse á zona e procederon a retirar as portas do vehículo para liberar á persoa atrapada. Finalmente, os Bombeiros non precisaron intervir, dado que o acceso á vítima foi resolto polos efectivos do GES.
Unha vez liberada, a persoa afectada foi atendida no lugar polo persoal médico mobilizado, sen que transcendera a gravidade das súas lesións.
