O Boletín Oficial da Provincia (BOP) publicou este xoves a aprobación definitiva da modificación do Regulamento de Títulos, Honras e Condecoracións do Concello de Santiago, que permitirá a inclusión das novas distincións ‘Alba de Compostela’ e ‘Mulleres de Compostela’. Segundo informou o goberno local, esta reforma foi aprobada inicialmente por unanimidade na sesión plenaria do pasado 27 de xuño e quedou ratificada tras finalizar o período establecido para a presentación de reclamacións ou suxestións.
Esta modificación permitirá ao Concello outorgar novos galardóns que recoñecerán, mesmo con carácter póstumo, a aquelas persoas ou entidades que presten “servizos extraordinarios” en diversos ámbitos, como o social, cultural, científico, deportivo, artístico ou veciñal. A distinción ‘Alba de Compostela’ estará destinada a recoñecer anualmente a catro persoas ou entidades vinculadas a Santiago, mentres que o galardón ‘Mulleres de Compostela’ destacará a oito mulleres que se consideren “referentes sociais” no ámbito da igualdade.
Ademais, esta reforma busca resolver algúns “defectos menores” da normativa anterior e clarificar a xerarquía entre os títulos e honras máis relevantes, como os de ‘Fillo predilecto ou adoptivo’ e a ‘Medalla de ouro de Santiago’. Tamén se decidiu suprimir o título de ‘Cidadán ilustre’, que nunca foi outorgado e que quedará substituído polos novos galardóns.
MODIFICACIÓNS NO TRANSPORTE URBANO
Por outra banda, o goberno local lembrou que as modificacións no servizo de autobús a Casas Novas están en funcionamento desde o pasado 25 de xuño, como consecuencia do corte da Rúa Pombal polas obras de reurbanización. A liña 4, que conecta Romaño coas Cancelas, foi a máis afectada polos cambios, pero mantense o número de frecuencias respecto ao ano anterior, con algunhas melloras, como o incremento dunha saída os sábados.
O Concello lamentou as molestias que estas modificacións provisionais poidan causar e destacou que a empresa municipal Tussa está á disposición dos veciños para calquera consulta ou dúbida.
