As persoas interesadas en participar nos Premios Selic de creación, do Concello de Santiago, poderán presentar as súas propostas en galego nos xéneros narrativa, poesía, teatro e ensaio ata o 10 de setembro.
O obxectivo deste concurso é incrementar a presenza de Santiago de Compostela na literatura escrita en galego. A obra gañadora recibirá unha dotación económica de 6.000 euros e haberá outros dous accésits de 1.500 euros.
Os textos deberán ser inéditos, coa cidade de Santiago como marco da acción ou referencia fundamental da obra. Os premios levan a publicación na colección Selic que edita o Concello, renunciando as persoas gañadoras a percibir dereitos de autoría por esa publicación.
As obras presentadas a narrativa ou ensaio deberán ter un mínimo de 150.000 caracteres, incluídos os espazos. As presentadas á modalidade de poesía un mínimo de 350 versos e as de teatro, un mínimo de 50.000 caracteres, incluídos espazos.
Os participantes deberán remitir ao Concello a obra en arquivo dixital nun ‘pen drive’ e un exemplar en papel.
A proposta estará acompañada por un sobre pechado identificado cunha lema ou pseudónimo e conterá o título da obra, nome e apelidos do autor, domicilio, DNI, breve currículo, correo electrónico e teléfono de contacto.
