O Concello de Santiago interpuxo ata 31 sancións por cantar e gritar na rúa e 7 propostas de sanción por usar megáfono na vía pública, algo que vai contra as ordenanzas municipais.
Así o reflicten os datos proporcionados polo consistorio con data 5 de agosto, nos que tamén se reflicten 152 sancións por consumir bebidas alcohólicas na vía pública e 202 por ouriñar na rúa.
A concelleira Miriam Louzao foi preguntada na mañá deste luns, en rolda de prensa, polas sancións interpostas en relación a comportamentos incívicos por parte dos turistas. Os datos, en todo caso, fan referencia a sancións tanto a foráneos como a residentes na cidade.
Sobre as molestias xeradas por algúns turistas, a concelleira lembrou que xa está en marcha a segunda parte da campaña ‘Fragil’, para concienciar sobre a necesidade de coidar o protocolo e manter unha actitude correcta na cidade, e que o 15 de agosto poranse en marcha os informadores de rúa.
Estes estarán activos ata finais do mes de setembro, un total de 45 días, dado que o noveno mes do ano é que o Compostela recibe a máis grupos e máis numerosos.
Tamén se está reforzando a presenza policial en áreas especialmente turísticas, dixo Louzao, que ratificou que para aqueles que incumpran as ordenanzas “haberá sancións”.
