O goberno de Santiago deu luz verde este luns ao procedemento de alta e de acceso ao Espazo Educativo e de Lecer María Miramontes para o curso 2024-2025, así como á gratuidade e aos prazos de inscrición para os períodos lectivo e non lectivo.
Todas as persoas que desexen participar nas actividades da Ludoteca (tanto nos períodos lectivos como non lectivos) deben estar dadas de alta e facelo a través do modelo ED009, dispoñible na sede electrónica do Concello. O procedemento de alta estará aberto os doce meses do ano.
A concelleira de Educación, Míriam Louzao, destacou a importante demanda do servizo e lembrou que, como novidade, o centro non tramitará altas nos períodos de solicitudes de praza.
As solicitudes presentaranse segundo modelo normalizado ben por medios electrónicos ou de maneira presencial, no Rexistro xeral do Concello de Santiago ou mediante calquera das formas previstas no artigo 16.4 da Lei 39/2015 do 1 de outubro, de procedemento administrativo común das administracións públicas.
Aqueles nenos que xa están dados de alta deben cubrir o formulario de solicitude que atoparán na web do centro para o programa de interese. Unha vez realizado este trámite, o centro publicará unha listaxe de solicitudes admitidas, a emendar e excluídas.
Aquelas que teñan que achegar ou emendar documentación terán 10 días hábiles para enviar a documentación (a través dun formulario habilitado na web) antes da publicación das listaxes definitivas. Recibirán comunicación mediante correo electrónico e publicarase na páxina web do centro o estado das solicitudes.
O período para a solicitude de praza para o período lectivo estará aberto entre o 26/08/2024 e o 4/09/2024 (ambos os incluídos); a listaxe provisional persoas admitidas e excluídas publicarase o 5/09/2024; a listaxe definitiva, o 20/09/2024; e confirmación de praza, do 21/09/2024 ao 27/09/2024. Durante o prazo de solicitude e asignación de prazas celebraranse xornadas de portas abertas, para as que será necesario inscribirse previamente na páxina web do centro. Os períodos non lectivos terán procesos de solicitude de praza independentes.
A programación do centro está destinada a nenos e nenas empadroados ou que estean matriculados nun centro de ensino no municipio de Santiago de Compostela e dispón dun total de 73 prazas autorizadas pola secretaría técnica de Política Social da Xunta de Galicia. Toda a documentación relativa aos procesos de matrícula poderá consultarse na web do centro.
OUTROS ASUNTOS
Nesta mesma sesión da Xunta de Goberno tamén se tomou en coñecemento da firma do convenio de colaboración entre a asociación para a promoción social e inserción sociolaboral Plataforma pol Emprego e o Concello de Santiago para o ano 2024, que recolle unha achega municipal de 12.000 euros.
Así mesmo, aprobáronse tres licencias particulares: unha para unha obra de acondicionamento dunha vivenda e dúas para arranxo de fachadas en edificios.
