O concelleiro de Urbanismo e Vivenda de Santiago, Iago Lestegás, asegurou que é necesario constituír unha entidade de conservación ante as condicións precarias do parque empresarial da Sionlla, e subliñou que o polígono “non pode seguir así”.
A falta de iluminación ou os restos de maleza son algúns dos exemplos que reflicten a degradación da Sionlla e que denunciou o presidente da Asociación Área Empresarial do Tambre, José Fernández Alborés, quen ofreceu a mediación da patronal entre a Xunta e o Concello para acordar unha solución.
Pola súa banda, o goberno compostelán explicou este xoves que agosto é “un mes complicado” para resolver un problema que “leva anos enquistado”, pero indicou que en setembro falarán “con quen teñan que falar”.
Nesta liña, destacou que no Concello existe vontade de solucionar un problema que leva moitos anos sen resolverse. Deste xeito, a alcaldesa en funcións, María Rozas, explicou que dialogaron en diferentes momentos co presidente desta asociación para demostrar “toda a súa colaboración”.
“Para nós é importante que se resolva canto antes, importante tamén por esa aposta que temos desde o goberno municipal pola diversificación económica e, por tanto, por manter os polígonos industriais de Santiago nas condicións apropiadas para que as empresas póidanse implementar neles”, subliñou María Rozas.
Así mesmo, detallou que a iluminación do parque empresarial non é competencia do Concello e que teñen informes xurídicos e documentos que avalan esta afirmación.
Con todo, reiterou a vontade de colaborar do goberno local porque entenden que hai un problema e que como cargos públicos do Concello de Santiago teñen a responsabilidade de “abrir todas as vías para resolver este problema e ter un polígono nas condicións adecuadas”. Ademais, confirmou que en setembro se reunirán coa consellería para tentar atopar unha solución, porque é un “tema prioritario”.
