A Unión Hoteleira Compostela estima que o mes de agosto acabará en Santiago cun lixeiro descenso na ocupación con respecto a 2023, debido a un “parón no consumo” unido a “unha falta de incentivos de lecer na cidade”.
Así o explicou o portavoz da entidade, José Antonio Liñares, que chamou a atención sobre a necesida de facer unha “oferta cultura atractiva” que some valor, xa que “sen ela, os viaxeiros non elijen compostela como destino”.
Para a asociación, “o encanto do patrimonio monumental e o Camiño xa non son suficientes para competir por outros destinos que están a apostar por un turismo de calidade de verdade, con bos concertos, exposicións e experiencias de lecer que fan que a estancia media suba”.
“O exemplo de éxito máis próximo témolo na cidade da Coruña, que teñen unha previsión do 92% de ocupación para este mes de agosto grazas á programación das Festas de María Pita e ao Festival Noroeste”, apunta. En Santiago, estiman que a ocupación roldará o 85%, dous puntos por baixo da do ano anterior.
En canto á ocupación para a Ponte da Asunción, do xoves 15 (festivo nacional) ao domingo 18, será cando se consigan as únicas cifras que rocen o cheo na cidade. Para moita xente “serán vacacións sobre vacacións”, tal e como apunta Liñares, “e tamén dará a oportunidade a quen estean a traballar de gozar duns días de descanso extra”.
Aos membros da asociación só os anima a “pensar que as reservas de última hora poidan cambiar a mala tendencia inicial”. Con respecto aos datos de xullo, a ocupación media dos hoteis asociados á UHC, entidade que agrupa o maior número de prazas hoteis da cidade, foi finalmente dun 78%, sendo un ano máis “o mes máis frouxo da tempada alta”.
A pesar de que tradicionalmente se considera tempada alta os meses de verán, a ocupación media de xullo da Unión Hoteleira Compostela foi menor que en xuño (87%) e que en maio (94%), meses nos que se programaron concertos con moito tirón, como o festival Son do Camiño ou o Gozo Fest, xunto a convencións e congresos que encheron a cidade.
