O Concello de Santiago aprobou os prazos e procedementos de admisión nos servizos de comedor e de madrugadores para o curso 2024-2025 na rede de centros públicos de educación infantil e primaria. O período de inscrición estará aberto do 16 de xullo ao 31 de agosto, segundo anunciou a portavoz municipal, Míriam Louzao, nunha rolda de prensa recente.
Os interesados deberán rexistrarse na APP ColeChef, e, unha vez aberto o prazo, presentar o impreso de solicitude de inscrición correspondente. Aqueles que xa fixeron uso dos servizos no curso anterior e están rexistrados só precisarán reactivar os servizos para o novo curso educativo.
Paralelamente, o goberno local impulsou a segunda fase da campaña ‘Fráxil’, dentro do Plan de Turismo Sustentable, cun orzamento de máis de 98.000 euros. Esta iniciativa, que se desenvolverá durante 45 días entre agosto e setembro, inclúe un decálogo de boas prácticas e unha “potente campaña de comunicación” en redes sociais, con equipos traballando directamente nas rúas para sensibilizar sobre un turismo respectuoso.
Ademais, na última xunta de goberno local, aprobouse o expediente de contratación para obras de ampliación da rede de abastecemento na estrada AC-250, con un orzamento de 85.000 euros e un prazo de execución de catro meses. Este proxecto forma parte do Plan Único de Concellos de 2023.
En canto aos convenios, foron acordados tres para o ano 2024 con distintas entidades, incluíndo a Asociación de Pais de Persoas con Trastorno de Espectro Autista (TEA), a Federación Galega de Kárate, e a Asociación Cultural Correlingua, cada un por un importe de 5.000 euros.
Finalmente, o Concello tamén resolveu a cesión provisional do uso do Estadio Municipal Verónica Boquete de San Lázaro e do campo de adestramento San Lázaro II a favor da SD Compostela para a tempada 2024/25, pendente de regulación definitiva mediante un novo acordo municipal.
