O arcebispo de Santiago, Francisco José Prieto, reivindicou este xoves a participación da Igrexa en cuestións que afecten á cidade, pola presenza material da institución, “considerablemente maior que noutras cidades”.
Así o trasladou durante a súa participación na última mesa de debate, antes do período estival, do ciclo ‘Compostela 2023-2027. Presente e futuro’, organizado pola Real Sociedade Económica de Amigos del País de la Ciudad de Santiago (RSEAPS).
Segundo apuntou, “a presenza material da Igrexa en Compostela, considerablemente maior que noutras cidades, fai que por unha banda os cidadáns sintan con maior intensidade, e por outra, xustifica de seu e fai xurdir para ela a oportunidade, pero tamén o reto e a responsabilidade, de poder participar nos procesos de reflexión sobre as cuestións que afectan ou interesan a Santiago”.
Na súa intervención, titulada ‘Unha cidade de Deus, unha cidade dos homes’, o arcebispo referiuse tamén ao interese da administración e as empresas por abrir canles de colaboración para dar unha segunda vida ao patrimonio inmobiliario da Igrexa compsotelana e polo ao servizo da cidadanía.
Respecto diso, indicou que “a reflexión que habería que abordar, sen dúbida, está relacionada cos custos de conservación, a depreciación por atoparse en mal estado e a falta de interese directo para as actividades da Igrexa“, polo que admitiu que quizá todo iso “aconselle explorar esas vías de colaboración”.
Segundo destacou, a Igrexa de Santiago é a entidade que ten “maior compromiso coas necesidades das persoas e as súas carencias, non só espirituais, senón afectivas, económicas, laborais, sociais e familiares” e engadiu que “talvez sería necesaria unha maior reafirmación pública da súa intención de ser a voz dos que non teñen voz”.
Por outra banda, Prieto tamén se referiu a a “necesidade de evitar a perda de identidade cristiá do Camiño de Santiago”, cuxa identidade espiritual e relixiosa débese “preservar como un desafío e unha responsabilidade”.
“CAMBIO DE ÉPOCA”
Con respecto ao contexto actual, o arcebispo de Santiago constatou que se está vivindo non só unha época de cambios, senón “un cambio de época” coa penetración de “unha especie de deconstruccionismo, onde a liberdade humana pretende construílo todo desde cero”, o que leva á acentuación do individualismo.
“Afrontamos os retos dun relativismo cultural e relixioso e un cambio antropolóxico de calado, polo que ante o ser humano que busca a verdade e o sentido da súa vida, a Igrexa axuda e propón ás persoas descubrir o sentido da súa propia existencia”, proclamou.
Finalmente, avogou por pór a política ao servizo do pobo e do ben común. “Cando nos programas electorais a noción do ben común foi substituída pola de interese xeral -que en absoluto son sinónimos-, cando se cumpriron dous anos da guerra de Ucraína, a Terra Santa segue en dramático conflito e Europa parece candada e deprimida; e cando o desenvolvemento da intelixencia artificial acelerouse e xera unha gran incerteza; é precisamente cando os católicos temos que comprometernos coa mellor política, esa que está verdadeiramente ao servizo do pobo, do ben común e da fraternidade”, subliñou.
