O xerente da área Sanitaria de Santiago de Compostela e Barbanza, Anxo Facio Villanueva, presentou este luns aos novos membros do equipo directivo ante os profesionais da sanidade pública compostelá.
No salón de actos do Hospital Clínico e por streaming, ante os mandos intermedios do persoal sanitario e non sanitario, así como representantes sindicais dos traballadores, o doutor Facio presentou ao novo director de procesos, Javier Ventosa; ao director de atención hospitalaria, Luís G. Taboada; á directora de enfermaría, Isabel Campos; e ao subdirector de Humanización e Atención á Cidadanía, Juan Manuel González.
No encontro, do que informou a Área Sanitaria nun comunicado, o xerente agradeceu publicamente o labor realizado polo equipo saínte e destacou o liderado desta área no ámbito asistencial, docente e investigador grazas ao prestixio dos seus profesionais.
Así mesmo, sinalou a gran importancia do traballo de todos os profesionais da sanidade pública compostelá, subliñando que todas as persoas que as conforman son fundamentais.
