O concelleiro de Mobilidade de Santiago de Compostela, Xan Duro, celebrou o “éxito” do festival O Son do Camiño, celebrado esta fin de semana na capital galega, “desde todos os puntos de vista, musical e de participación”, e valorou positivamente os dispositivos de seguridade e de mobilidade.
En rolda de prensa este luns, o edil sinalou que aínda que “houbo algún atasco puntual o xoves no inicio da chegada da xente que viña acampar”, apenas recolleron queixas e as incidencias resolvéronse “rápido”.
Duro aproveitou para agradecer “o traballo enorme” da Policía Local, de Protección Civil e do transporte urbano de Santiago. “Este é un festival que vén desde 2018; está bastante rodado e están a funcionar moi ben as cousas”, aseverou.
Ademais, cuestionado polo funcionamento durante os primeiros días de desdobramento da liña de bus que vai ao aeroporto (6A), Xan Duro tamén afirmou que está a funcionar “moi ben” e con “moi poucas incidencias”.
Neste sentido, apuntou que “non se están saturando os buses” e que mesmo durante O Son do Camiño a Liña 6 “moveu moi ben á xente” con cheos en “momentos moi puntuais”.
