A alcaldesa de Santiago, Goretti Sanmartín, anunciou que a Xunta de Goberno Local aprobará o vindeiro luns a autorización para recibir a obra do Pazo de Raxoi, que contará cun programa de visitas guiadas ao edificio a partir de outono.
Tal e como lembrou a mandataria compostelá na rolda de prensa semanal, a obra obtivo unha subvención de tres millóns de euros para realizar o mantemento e rehabilitación de patrimonio histórico con uso turístico. Así, o fin último era converter o edifico nun recurso turístico aberto a locais e visitantes.
O deseño do proxecto incorporou elementos para mellorar a accesibilidade ás instalacións, como unha rampla na entrada ao mesmo, e un ascensor para os pisos inferiores. Ademais, instaláronse sistemas de ventilación e climatización.
Neste sentido, a rexedora lembrou que o Concello nunca estivo aberto ás visitas, máis que de forma puntual e que “moita xente” non coñece a súa historia e memoria. De feito, puxo de exemplo que nel edificio estivo o cárcere da Falcona.
Por iso, a partir deste outono ofreceranse visitas para tres grupos de persoas. En primeiro lugar, abriranse as portas aos centros escolares para que os estudantes poidan asistir en período lectivo. A visita irá acompañada de material didáctico para os asistentes.
En segundo lugar, facilitarase a visita gratuíta a asociacións culturais, veciñais ou de calquera outro ámbito radicadas na capital galega. Estas poderanse reservar dentro do calendario que se habilite, que será en horario de tarde ou fin de semana.
Finalmente, os turistas poderán reservar a través de Turismo de Santiago a visita á institución municipal, fóra do horario de funcionamento ordinario das oficinas municipais. Para elas, establecerase un prezo público, con bonificacións para estudantes e outros colectivos.
Un peche de semana “importantísimo” no que tamén quixo destacar o fin das obras na rúa de Amor Ruibal, en Pontepedriña, aberta ao tráfico desde o luns. “Esta obra é unha actuación pioneira de adaptación ao cambio climático e de devolución de espazo ás persoas”, remarcou.
Segundo subliñou, grazas a esta actuación a rúa dispón de máis árbores, máis verde, menos asfalto e máis materiais drenantes para facela “máis habitable e humana”.
