A Policía Nacional de Santiago detivo a unha parella acusada de cometer, en diferentes barrios da cidade compostelá, 20 roubos con forza no interior de vehículos e catro estafas bancarias, entre outros delitos. Segundo informou o corpo policial nun comunicado, o home foi detido na madrugada do día 28 por axentes da Brigada de Seguridade Cidadá da Policía Nacional de Santiago de Compostela cando circulaba nun dos vehículos denunciados como subtraídos.
Os roubos, que viñan sucedendo desde mediados de maio, perpetrábanse en vehículos estacionados na vía pública e en garaxes comunitarios. Para iso, fracturaban os cristais dos portelos con calquera tipo de obxecto e subtraían os efectos de valor do interior. Posteriormente, os detidos realizaban compras en varios establecementos cos cartóns subtraídos, mentres non eran anuladas. Así mesmo, o corpo policial destacou que algúns dos automóbiles foron subtraídos con chave e utilizados para a comisión de novos ilícitos penais.
A investigación foi levada a cabo polo Grupo de Patrimonio da Brigada de Policía Xudicial para esclarecer e determinar a participación do presunto autor, así como a colaboración da súa parella na venda dos artigos subtraídos, o que permitiu recuperar diversos efectos que foron entregados aos seus lexítimos propietarios. Ata o momento, impútanselles un total de 20 roubos con forza no interior de vehículos, catro estafas bancarias, tres roubos ou furtos de uso de vehículos, tres furtos en interior de vehículos, un delito de receptación e outro de danos, feitos labores en distintos barrios da cidade compostelá. Os detidos foron postos a disposición do Xulgado de Garda de Santiago de Compostela.
