A Policía Local de Santiago alertou da detección de dous novos intentos de estafa na capital galega nos que os autores se fan pasar por persoal vinculado ao Concello ou ao propio corpo policial para reclamar pagamentos ou achegas económicas.
Segundo informou o Goberno compostelán nun comunicado, os feitos foron rexistrados nos últimos días e responden a dúas modalidades diferentes. No primeiro dos casos, unha persoa contactou telefonicamente con establecementos da cidade identificándose como xestor do Concello de Santiago. Durante a chamada, reclamaba o pagamento dunha suposta taxa municipal.
O segundo intento de fraude detectado consistiu na solicitude dunha axuda económica para unha presunta revista da Policía Local. Os axentes advertiron de que esa publicación non existe e que, polo tanto, calquera petición económica realizada con ese argumento debe considerarse sospeitosa.
Ante estas situacións, a Policía Local pediu á cidadanía e ao tecido comercial que extremen a precaución fronte a chamadas, mensaxes ou visitas nas que se reclame diñeiro en nome de institucións públicas sen unha comunicación oficial previa. O corpo municipal lembrou que, en caso de dúbida, cómpre contrastar sempre a información a través das canles oficiais do Concello ou da propia Policía Local.
Os axentes tamén recomendaron denunciar calquera feito destas características para facilitar a súa investigación e evitar que novas persoas ou establecementos poidan verse afectados por este tipo de prácticas. A advertencia chega despois de que nos últimos días se tivesen coñecemento destes dous intentos de fraude na cidade, ambos apoiados no uso indebido da imaxe ou da autoridade municipal.
