O home que fora detido o venres en relación con tres supostas agresións sexuais ocorridas no Milladoiro  foi atopado sen vida o sábado nunha estrada da localidade de Silleda. Fontes próximas apuntan a que non hai indicios da participación de máis persoas.

O home, de 45 anos e veciño da localidade pontevedresa de Silleda, fora detido pola Garda Civil o venres como presunto autor de tres delitos de agresión sexual cometidos o mesmo día no núcleo urbano do Milladoiro.

Segundo informou o Instituto Armado, a investigación comezou en maio tras unha denuncia presentada por unha das vítimas, que foi abordada de maneira sorpresiva e intimidatoria no portal da súa vivenda con fins de índole sexual. A vítima conseguiu librarse do agresor e fuxir do lugar para pedir axuda e poñerse a salvo.

Os axentes, tras as primeiras pescudas e a descrición física achegada, determinaron que o agresor repetira o mesmo patrón delitivo no municipio ese mesmo día en, polo menos, outras dúas ocasións. En todos os casos, o autor aproveitábase de situacións de escasa visibilidade na vía pública e da total ausencia de relación previa coas mozas.

Os axentes comprobaron que o sospeitoso se desprazara expresamente desde outra provincia para cometer as агresións e que, despois, regresaba ao seu domicilio. A operación, denominada “Millastalker”, concluíu coa localización e detención do implicado no concello de Silleda (Pontevedra), ao que lle imputaban tres delitos de agresión sexual.

A Garda Civil remitiu os datos e o modus operandi acreditados nesta actuación ao resto de forzas e corpos de seguridade do Estado, co obxectivo de cruzar información e colaborar activamente no esclarecemento doutros posibles feitos delituosos da mesma natureza que puidesen quedar rexistrados no territorio nacional.