As obras da nova casa de acollida de vítimas de violencia de xénero impulsada pola Fundación Monte do Gozo-Proxecto Home estarán terminadas en novembro, segundo avanzou a Xunta nun comunicado. A conselleira de Política Social e Igualdade, Fabiola García, visitou este luns os traballos do inmoble que acollerá esta nova dotación, que será a primeira especializada en vítimas con problemas de adicción.
Este novo recurso será unha realidade grazas ao convenio entre a Xunta e a Fundación, a través do cal se investirán 960.000 euros para reformar e equipar un inmoble de titularidade da Fundación para albergar este servizo, que contará con 17 prazas. García destacou que as mulleres vítimas de violencia de xénero con problemas de adicción son “especialmente vulnerables“, polos malos tratos que sufriron e pola súa adicción ao alcol ou outras drogas.
