A USC investiga, a través do proxecto IDEOLINGAL, as ideoloxías lingüísticas e a construción de identidades, centrando a súa atención no papel emerxente da creación de contido en galego nas redes sociais orais. Segundo explican nun comunicado, a investigación propón unha metodoloxía innovadora que procura analizar como nesta oralidade dixital é posible observar procesos de cambio lingüístico, ademais de coñecer de que maneira o contacto con español e inglés afecta á produción en galego do sector de poboación máis nova.
As motivacións para o emprego da lingua galega, o papel do galego normativo na contorna dixital e a creación de comunidades de uso son tamén cuestións que se abordarán analiticamente ao longo do tres anos de duración do proxecto. A investigación, con financiamento do Ministerio de Ciencia, Innovación e Universidades e liderada desde o Instituto da Lingua Galega (ILG) da USC, aspira a coñecer en profundidade un fenómeno emerxente de gran relevancia para o idioma: a actual eclosión de perfís en galego nas principais redes sociais orais, Instagram e TikTok.
O proxecto pretende determinar se están en marcha na sociedade procesos de (re)creación identitaria, tanto individual como colectiva, relacionados coa lingua. A hipótese de partida consiste en postular que efectivamente hai cambios significativos na visión e na práctica lingüística en galego das novas xeracións, “xeralmente menos preocupadas pola corrección formal da mensaxe e máis implicadas en procurar unha naturalidade performativa que lles permita triunfar en redes”.
“A hipótese coa que estamos a traballar é que a xente nova está a reconsiderar o papel das variedades dialectais nas súas publicacións para as redes sociais orais”, explican os profesores responsables da investigación.
