Os Bombeiros de Santiago interveñeron de urxencia nun edificio situado na rúa de San Pedro debido á rotura da acometida xeral do gas. O incidente, que afectou inicialmente ao primeiro e ao segundo piso do inmoble, provocou unha fuga que obrigou a evacuar o edificio por protocolo mentres os efectivos de extinción realizaban as tarefas de ventilación.
O 112 Galicia recibiu o aviso do suceso ao redor das 18:20 horas, cando un particular alertou de que escoitara un “asubío” procedente dunha tubaxe de gas no citado inmoble. Ata o lugar dos feitos desprazáronse de inmediato patrullas da Policía Local e da Policía Nacional, canda os efectivos do parque de Bombeiros compostelán.
Fontes municipais explicaron que os Bombeiros procederon a pechar a chave do gas de maneira inmediata e realizaron traballos de ventilación para rebaixar os niveis de concentración do combustible. Pasadas as 19:15 horas, a situación quedou totalmente normalizada e controlada, sen que o incidente provocase ningún tipo de dano persoal. Os profesionais permaneceron no lugar realizando as últimas comprobacións de seguridade.
