A alcaldesa de Santiago, Goretti Sanmartín, desexou “sorte” nas eleccións municipais de 2027 ao portavoz local do PP, Borja Verea, tras ser confirmada a súa candidatura á Alcaldía polo presidente galego do partido, Alfonso Rueda. Malia os bos desexos persoais, a rexedora subliñou que a súa “aspiración” é que “se poida repetir” o goberno actual, que lidera o BNG en bipartito con Compostela Aberta (CA).
“As opcións van estar de lado, neste caso, do Bloque Nacionalista Galego como forza que vai aspirar a revalidar esa Alcaldía sen ningunha dúbida”, vaticinou Sanmartín ante as preguntas dos medios nunha rolda de prensa celebrada este venres no Pazo de Raxoi. A alcaldesa amosouse convencida de que o traballo realizado polo seu executivo durante este mandato foi “moi bo”, o que servirá de base para solicitar de novo a confianza da cidadanía compostelá.
Durante a xornada de onte, Alfonso Rueda acudiu ás atraccións das Festas da Ascensión e, desde alí, ratificou a súa aposta por Borja Verea como candidato a alcalde da capital galega. Cuestionada pola súa valoración sobre este movemento, Sanmartín apuntou que non considera que deba “avaliar os candidatos doutras formacións políticas”. “Deséxolle moita sorte como candidato, pero espero, desde logo, que nas eleccións de 2027 pois non poida ter esa Alcaldía”, confiou a rexedora.
