A Policía Local de Santiago identificou á persoa responsable de abandonar arredor dun cento de sacos de cascallos na contorna de San Lourenzo, concretamente na rúa da Ponte de San Domingos, uns feitos polos que poderá afrontar unha sanción de ata 3.000 euros.
A actuación produciuse despois de que nas últimas semanas se detectasen varios depósitos ilegais de residuos de obra nesta zona. Ante esta situación, activouse un dispositivo específico no que participaron varios axentes, tanto de paisano como uniformados, co obxectivo de localizar á persoa autora das verteduras.
Segundo informou o Concello, a investigación contou tamén cun papel relevante da colaboración cidadá, que contribuíu a avanzar nas pescudas. No transcurso do operativo, a Policía conseguiu localizar nunha obra de reforma o vehículo presuntamente empregado para transportar e abandonar os residuos.
A partir desta identificación, os axentes deron co operario responsable, que recoñeceu ser o autor do vertido dos sacos de cascallos na rúa da Ponche de San Domingos. Ademais, a Policía Local atribúelle tamén outras verteduras anteriores rexistradas no mesmo punto.
Dende o Concello de Santiago insisten na necesidade de evitar este tipo de prácticas, lembrando o impacto ambiental e urbano que supoñen este tipo de depósitos incontrolados. Neste sentido, fan unha chamada á responsabilidade da veciñanza e á súa colaboración para denunciar comportamentos semellantes e facilitar a identificación das persoas responsables.
