O subdelegado do Goberno na Coruña, Xullo Abalde, avanzou que a comisaría provisional da Policía Nacional de Santiago, que se situará na zona de Santa Marta, acollerá parte das unidades de investigación e os servizos de atención á cidadanía, como oficinas de DNI e denuncias. Así o detallou este xoves xunto á comisaría xefa de Santiago, Nuria Palacios. “Estamos ao final deste longo camiño. En breve finalizaranse todos os trámites administrativos para que ese espazo poida ser utilizado”, remarcou Abalde.
O baixo de Santa Marta, que será de aluguer e terá unha superficie de aproximadamente 360 metros cadrados, non está habilitado para acoller os calabozos, polo que se manterá o sistema de “colaboración con outras administracións”. Isto mesmo sucede coa galería de tiro, polo que os axentes terán que usar as infraestruturas doutras instalacións durante un tempo.
CONTRATO POLO PROCEDEMENTO DE URXENCIA
En canto ao edificio da comisaría que sufriu un incendio hai uns meses, seguirá baleiro co obxectivo de que todo o espazo estea dispoñible para as obras necesarias. Actualmente xa se realizou a avaliación de danos, o estudo da estrutura e da calidade do aire, así como o proxecto de recuperación. Os contratos para rehabilitar o inmoble tramitaranse polo procedemento de urxencia. En canto aos prazos, Abalde indicou que, sendo optimistas, a comisaría podería estar en funcionamento para o principio do Ano Santo 2027.
O subdelegado enxalzou o traballo da Policía Nacional, asegurando que a seguridade estivo “plenamente garantida en todo momento” e que os indicadores reflicten que os servizos non se viron resentidos. Mentres se completa o traslado, seguen operativas as dependencias temporais na mesma rúa da comisaría e dous Vehículos Integrais de Documentación (VIDOC) na praza do Obradoiro para DNI e pasaportes. Estes vehículos prestan tamén servizo en horario de tarde a concellos como Padrón, Arzúa, Noia, Ames, Fisterra, Outes, Rianxo, Muros, Carnota, Melide e Cee.
