Correos puxo a disposición dos pelegríns que vaian facer o Camiño de Santiago en bicicleta a posibilidade de contratar en liña o envío das súas bicis de volta aos seus lugares de orixe. Esta novidade, detallou a entidade, estréase no Paq Bicicleta, que ata agora só podía solicitarse presencialmente en oficina. Deste xeito, a contratación a través da páxina web permite deixar todo reservado antes de iniciar a ruta e así “evitar a preocupación de como facer regresar a bicicleta de volta a casa”.
O servizo de Paq Bicicleta pode solicitarse a través dun formulario no que se indica a data na que se desexa enviar a bici desde a Oficina Principal de Correos de Santiago, cantas unidades son e a oficina postal de destino. Ademais, para os pelegríns que opten por esta modalidade, Correos ofrecerá caixas máis grandes, de 170 cm de longo, 30 cm de ancho e 90 cm de alto, para poder embalar os vehículos co mínimo desmonte posible.
Os envíos contarán cun seguro de 300 euros, ampliable segundo as necesidades, e un número de seguimento para ter a bici localizada en todo momento. Os pelegríns poderán realizar estes trámites todos os días, de luns a domingos e festivos incluídos, nun horario de 08:30 a 20:30 horas.
