O servizo de Medicina Preventiva e Saúde Pública da área sanitaria de Santiago puxo en marcha un protocolo de actuación tras detectarse un brote de sarna no Hospital Provincial de Conxo, que afecta a un paciente e a 20 profesionais do centro con síntomas compatibles.
Segundo a información facilitada, a orixe do brote sitúase nun paciente que xa ingresou no hospital coa patoloxía e cunha variante considerada de maior capacidade de transmisión. A partir dese caso inicial, identificáronse profesionais con posibles síntomas, que permanecen en seguimento clínico e baixo tratamento, mentres a área sanitaria indica que o brote está actualmente “baixo control”.
Desde a confirmación do caso, activáronse de inmediato os protocolos de vixilancia epidemiolóxica e control de infeccións, co obxectivo de limitar a propagación e garantir a seguridade tanto de pacientes como de persoal sanitario e acompañantes. Neste contexto, levouse a cabo o estudo dos contactos estreitos e aplicáronse as medidas recomendadas polas autoridades sanitarias.
A sarna é unha enfermidade que se transmite principalmente mediante contacto directo prolongado pel con pel e pode presentar un período de latencia antes da aparición dos síntomas. Desde a área sanitaria subliñan que non está relacionada coa falta de hixiene e que o tratamento resulta eficaz, habitualmente mediante medicación tópica ou oral.
Como parte das actuacións, o hospital reforzou as medidas preventivas, incluíndo o illamento dos casos confirmados cando é preciso, a intensificación das tarefas de limpeza e desinfección de superficies e téxtiles, así como a formación específica do persoal sanitario, que participou en sesións informativas co equipo de Medicina Preventiva.
OUTRO BROTE NUNHA RESIDENCIA DE MAIORES DE OLEIROS
De maneira paralela, a Consellería de Sanidade confirmou a existencia doutro brote de sarna nunha residencia de maiores de Oleiros, na provincia da Coruña. Neste caso, os primeiros síntomas detectáronse o pasado 9 de abril e o brote afecta a un total de 13 persoas: nove residentes e catro traballadores.
A residencia comunicou a situación o día 14 de abril, momento no que se activou o protocolo correspondente. As autoridades sanitarias estableceron medidas de control, entre elas o tratamento profiláctico para residentes e persoal nas áreas afectadas, co obxectivo de conter a transmisión.
