Turespaña, responsable da xestión e conservación do Hostal dos Reis Católicos, lembrou que os actuais traballos de reparación están contemplados no Plan Director de Conservación elaborado, ao que a Xunta deu a súa aprobación en 2022 e que “establece as directrices para todas as intervencións no edificio”. Así o recolle este organismo estatal nun comunicado emitido no medio das críticas expresadas por asociacións ante a colocación de tubos nas gárgolas deste histórico emprazamento situado na Praza do Obradoiro, que forma parte da rede de Paradores de Turismo e que está considerado como o hotel máis antigo de España.
“Como todos os proxectos de conservación en patrimonio cultural, as distintas opcións e solucións do proxecto son froito dun rigoroso estudo por parte dos seus responsables que contempla a conservación a futuro, a compatibilidade de materiais e a mínima intervención, aliñados cos estándares nacionais e internacionais en materia de conservación, reforzando a súa calidade e solvencia”, explica o texto difundido. A entidade destaca o labor realizado polo director do proxecto, Fernando Cobos, que é redactor tamén do Plan Director de Conservación e conta cun “equipo multidisciplinar de especialistas”, como arqueólogos e restauradores que desenvolven as solucións do proxecto.
Precisamente, a Xunta ha agendado para esta semana unha reunión co arquitecto responsable para atopar “unha solución técnica adecuada, idónea e funcional” e que tamén sexa satisfactoria esteticamente, segundo explicou esta mañá o conselleiro de Cultura, José López Campos. En declaracións aos medios, expresou o “rexeitamento máis que xustificado” dos técnicos do seu departamento aos tubos colocados. Un informe redactado por eles mesmos —en “supervisión” ao Plan de Turespaña— recollía a colocación de lanzas, pero pedía estudar este aspecto de “forma específica”.
