O Concello de Santiago manterá “en breve” un encontro coa nova reitora da Universidade de Santiago de Compostela, Rosa Crujeiras, co obxectivo de abordar cuestións comúns e fortalecer a cooperación institucional. Así o confirmou a portavoz do Goberno local, Míriam Louzao, na rolda de prensa posterior á Xunta de Goberno semanal.
Segundo explicou, trátase dunha reunión “que temos que ter en breve, para poder tratar todas as cuestións que nos competen a ambas as institucións e por suposto manter esa coordinación e traballo conxunto que estamos seguras que imos poder manter”.
A portavoz municipal trasladou tamén a súa felicitación á nova reitora, que tomou posesión do cargo o pasado venres, e desexoulle “o mellor”, ao considerar que o seu labor será “tamén bo para todo Santiago”.
Louzao referiuse ao discurso de investidura de Crujeiras, do que destacou o seu contido e orientación. “Promete un mandato moi positivo”, afirmou, ao tempo que puxo en valor que a nova reitora incidise “no valor da educación pública, o valor da universidade para a conformación dunha sociedade mellor, e o valor de que as mulleres teñan papel en todos os ámbitos sen ter que seguir demandándoo”.
No marco destas declaracións, a portavoz tamén quixo recoñecer o labor do anterior reitor, Antonio López, ao que agradeceu “todo o traballo” desenvolvido durante o seu mandato. “Foi moi fácil traballar con el” e destacou o seu carácter “moi afable”, unha actitude que, segundo indicou, “agradece tamén nestes tempos que corren”.
Finalmente, Louzao subliñou a “predisposición” da nova reitora para manter unha relación fluída co Concello, insistindo en que o encontro entre ambas institucións terá lugar proximamente co fin de avanzar en proxectos compartidos para a cidade.
