A Asociación de Veciños do Ensanche Raigame avanzou que levará aos tribunais o proxecto do goberno local de Santiago de Compostela para o solar do antigo colexio Peleteiro.
Nun comunicado, o colectivo sinala que presentará un contencioso administrativo contra a modificación do Plan xeral de ordenación municipal (PXOM) que será debatida no pleno do xoves para a súa aprobación.
Raigame sostén que “esta será a última oportunidade de dotar ao Ensache dos servizos sociocomuntarios que tanto tempo levan demandado” e que “durante tanto tempo negáronselle”.
A asociación censura que, de todas as demandas realizadas, só ofréceselles un espazo de 900 metros cadrados para unha poboación envellecida dun total de 30.000 residentes, dos cales a metade están censados no barrio.
“Esperabamos que este espazo fose un futuro centro de día pero moito temémonos que para cando sexa unha realidade xa estea sobresaturado, tendo en conta a demanda existente”, indican para asegurar que “tamén sería necesaria unha gardaría pública” se se quere revitalizar a zona.
Tamén sostén que o Ensache é o barrio “máis densamente poboado da cidade e o que menos dotación social e comunitaria ten en consideración á súa poboación”. “Un barrio cuxa degradación social e económica resulta cada día máis evidente”, indica.
Así as cousas, apunta que no solar do vello colexio Peleteiro hai unha oportunidade para dotarse de espazos verdes que actúen como refuxios climáticos para actividades de conciliación familiar e tamén espazos multiusos nos que realizar actividades culturais, veciñais e comerciais que axudan a dinamizar social e comercialmente a cidade.
“Mesmo poderiamos recuperar a actividade cultural que este barrio tivo anos atrás na desmantelada Aula de Cultura de Carreira do Conde”, apuntado.
A asociación asegura que todas estas reivindicacións “nunca foron atendidas porque a empresa propietaria do solar negouse sempre xa que a presión lucrativa urbanística primaba moito máis que a social”. Con todo, sostén que agora non debería existir esa presión xa que “o solar pasará a ser propiedade Empresa Pública de Vivenda CASA 47”.
“Se isto é así, por que o goberno municipal segue negando as dotacións sociocomunitarias tan necesarias e prefire facer baixos comerciais cando ao redor hai tantos pechados?”, pregunta Raigame.
A asociación, ademais, acusa o goberno local de actuar con “aleivosía e nocturnidade” na tramitación desta modificación urbanística da PXOM cando, segundo apunta, “os dous anteriores alcaldes sempre quixeron chegar a acordos cos veciños”:
Neste sentido, critican que o goberno local persista “co mesmo proxecto especulativo da anterior empresa” que “implicaría introducir 400 coches máis no aparcadoiro soterrado do futuro inmoble” e na zona cando “o que se persegue coa humanización da rúa Santiago de Chile e outras rúas é reducir o tráfico rodado dentro da cidade”.
