O Grupo Municipal Socialista de Santiago de Compostela decidiu, finalmente, absterse na votación dos orzamentos municipais, que se celebrará esta tarde nun pleno extraordinario. Aínda que non está de acordo en aspectos craves das contas e veas “pouco ambiciosas”, descartou o voto en contra despois de que o goberno incorporase unha parte “moi parcial” das súas propostas.
“Non podemos votar a favor porque estes non son os nosos orzamentos”, xustificou o portavoz municipal, Sindo Guinarte, repetindo as palabras que xa pronunciou a semana pasada cando anunciou, xunto a Marta Abal, que descartaban votar ‘si’.
Guinarte explicou, nun audio remitido aos medios, que non comparten aspectos que entende “clave”, como a previsión de ingresos, que tachou de “pouco realista”. Neste ámbito, puxo como exemplo a estimación de ingresos por multas, que cualificou de “non razoable”.
O portavoz socialista criticou tamén a previsión de gasto e advertiu de que, a pesar de tratarse do orzamento “máis alto da historia do Concello de Santiago”, contempla unha partida de investimentos “moi reducida”, xa que “é a metade da prevista no orzamento de 2025”.
Con todo, o portavoz socialista explicou que o grupo tampouco votará en contra tras un proceso de negociación no que o Goberno local incorporou unha parte “moi parcial” das súas propostas, tanto en actuacións concretas como en compromisos políticos. Esta aceptación parcial, segundo indicou, é a que leva ao grupo a adoptar “esta posición intermedia de abstención”.
Pola súa banda, as concelleiras non adscritas –expulsadas do PSOE– trasladaron que, con todos os preacordos “incumpridos” e as súas 20 propostas “ignoradas”, o voto “só pode ser a abstención”. Mentres, o PP reservou o sentido do seu voto, que decidirá na reunión previa ao pleno. No entanto, o seu portavoz, Borja Verea, insistiu en que faría uns orzamentos “completamente distintos”.
