O Centro de Investigacións en Medicina Molecular e Enfermidades Crónicas (CiMUS) da Universidade de Santiago de Compostela organizará o vindeiro 20 de marzo na Facultade de Psicoloxía o encontro ‘Unistem Day 2026’, unha xornada internacional de divulgación científica centrada na investigación en células nai e terapia celular. A iniciativa está promovida pola Università degli Studi di Milano e considérase o principal evento mundial dedicado á difusión deste ámbito da ciencia entre a mocidade.
A actividade está impulsada polo Grupo de Neurobioloxía Celular e Molecular da Enfermidade de Parkinson do CiMUS, dirixido polo catedrático José Luis Labandeira, e desenvolverase baixo o lema “El viaje interminable sobre investigación en células madre”. O seu obxectivo é achegar a ciencia ao alumnado de secundaria e bacharelato dun xeito divulgativo, ao tempo que se pretende fomentar o interese pola carreira investigadora e polas vocacións científicas.
Segundo explican os investigadores do CiMUS Juan Parga, Jannette Rodríguez e Ana Rodríguez, responsables da organización do encontro na USC, “ao longo destes 18 anos, Unistem Day consolidouse como o maior evento internacional de divulgación científica dedicado ás células nai, achegando a ciencia a máis de medio millón de estudantes”. Engaden que se trata dunha iniciativa que contribúe a mostrar ás novas xeracións como a investigación se transforma en coñecemento útil para a sociedade.
A Facultade de Psicoloxía reunirá preto de 300 estudantes e profesorado procedentes de distintos centros educativos da contorna de Santiago. Entre eles figuran o Colexio Compañía de María, o IES Rosalía de Castro, o Colexio Manuel Peleteiro, o IES Arcebispo Xelmírez I, o IES Arcebispo Xelmírez II, o IES Pontepedriña, o IES do Milladoiro e o IES Lamas de Abade.
Durante a xornada desenvolveranse charlas impartidas por docentes e investigadores da USC centradas nos avances máis recentes na investigación con células nai e nas aplicacións da terapia celular. Entre os temas que se abordarán figuran cuestións como a investigación da enfermidade de Parkinson, a identidade e desenvolvemento das células nai, a construción do corpo humano a partir das células ou a relación entre estas e a plasticidade cerebral.
O programa incluirá tamén actividades interactivas e xogos educativos destinados a explicar conceptos científicos de forma participativa. Estas propostas realizaranse coa colaboración de CASIO División Educativa, Principia e o propio CiMUS da USC, e están orientadas a facilitar a comprensión de cuestións relacionadas coa bioloxía celular e co orixe e funcionamento da vida.
A organización destaca que o encontro pretende ofrecer un contexto educativo dinámico e accesible, no que o alumnado poida coñecer de primeira man o traballo investigador e o impacto social da ciencia.
ACTO INSTITUCIONAL DE APERTURA
A xornada comezará cun acto de inauguración institucional no que participarán un representante da USC, o decano da Facultade de Psicoloxía, Arturo Xosé Pereiro, e o director adxunto do CiMUS e investigador principal do grupo organizador, José Luis Labandeira.
O ‘Unistem Day 2026’ conta ademais co patrocinio de diversas entidades vinculadas á investigación, á educación e ao ámbito empresarial, entre as que figuran Papelería Xaquín, Celta Ingenieros, Cienytech, Cientisol, Fisher Scientific, Casio División Educativa, Miltenyi Biotec, Principia, Merck, Editorial Elsevier, Editorial Panamericana, Editorial La Esfera de los Libros, Domino’s Pizza, Gadis e Albarin Catering.
