O Concello de Santiago cedeu un local municipal á Policía Nacional tras o incendio que sufriu a comisaría da capital galega o pasado 12 de febreiro.
Así o trasladaron fontes municipais un mes despois do lume, que se orixinou na galería de tiro do edifico e afectou a varias salas do mesmo. Debido ao suceso, a Policía Nacional habilitou dous puntos móbiles para facer tanto o DNI como o pasaporte na Praza do Obradoiro.
Neste contexto, o Concello subliñou que estivo a disposición da Policía Nacional e da Delegación do Goberno “desde o primeiro momento” en que se produciu o incendio.
Así mesmo, fontes municipais aseguraron que a propia alcaldesa, Goretti Sanmartín, estivo en contacto coa comisaria e as demais autoridades.
Finalmente, este venres o Goberno local acordou coa Policía Nacional o uso dun local municipal atendendo ás necesidades que formularon.
