Un equipo internacional dirixido desde o Intituto de Investigación Sanitaria de Santiago de Compostela (IDIS), identificou novos factores biolóxicos implicados no crecemento do aneurisma de aorta abdominal, unha enfermidade cardiovascular grave e potencialmente mortal.
Tal e como explicou a entidade nunha nota de prensa, o aneurisma de aorta abdominal consiste nunha dilatación anormal da arteria principal do corpo e adoita evolucionar de forma silenciosa. A súa rotura ten unha “elevada mortalidade”, polo que mellorar a capacidade para predicir a súa evolución é un dos “grandes retos”.
Neste contexto, o estudo analiza mostras de sangue de pacientes europeos e demostra que a actividade da fosfatasa alcalina circulante e a degradación do pirofosfato, unha molécula que protexe fronte á calcificación das arterias, están relacionadas coa velocidade de crecemento do aneurisma nas súas fases iniciais.
Así, os resultados mostran unha relación inversa entre a degradación do pirofosfato en sangue e o crecemento do aneurisma, o que suxire que “algúns procesos de calcificación poderían contribuír a estabilizar a parede da aorta en determinados pacientes”.
Neste sentido, o estudo publicado en Journal of Molecular Medicine achega unha base científica para o desenvolvemento futuro de biomarcadores sanguíneos que permitan “mellorar a estratificación do risco e o seguimento personalizado dos pacientes con aneurisma de aorta abdominal”.
“Actualmente, o seguimento dos aneurismas pequenos baséase case exclusivamente en probas de imaxe. Os nosos resultados abren a porta a identificar procesos biolóxicos medibles en sangue que poderían axudar no futuro a predicir a súa evolución”, explicou o investigador e doutor Ricardo Vila-Bellosta.
Con todo, os investigadores indicaron que “aínda que é un estudo piloto, os resultados “xustifican a realización de novos estudos clínicos a maior escala” que confirmen estes achados e avalíen a súa posible aplicación clínica.
