A Plataforma Ulloa Viva mantivo este martes no Pazo do Hórreo encontros con todos os grupos parlamentarios, aos que o presidente do colectivo, Juan Pedro Sánchez, convidou a participar o próximo 14 de decembro en Santiago na manifestación convocada por Ulloa Viva e a Plataforma en Defensa da Ría de Arousa baixo a lema ‘Do río ata o mar. Polas que somos e polas que virán. Altri Non. Fóra Xa’. Segundo informou nun comunicado, Ulloa Viva trasladou no Parlamento galego a preocupación dos veciños porque “o proxecto non está parado”. “Traballamos e traballaremos para que se dea carpetazo definitivo a un plan que xa deixamos claro que non ten lexitimidade social”, esgrimiu.
Os membros de Ulloa Viva reuníronse cos deputados Cristina, Sanz, Gonzalo Trenor e Miguel Lorenzo, do Grupo Popular, nun encontro no que a plataforma lles trasladou a “preocupación” dos veciños nas zonas afectadas polo proxecto de Altri. Tamén lles lembrou a responsabilidade da Xunta para “pechar” o proxecto de Altri en aspectos “pendentes” como a petición da captación de 46 millóns de litros de auga diarios do encoro de Portodemouros, a Autorización Ambiental Integrada (AAI) pendente da Xunta e a aprobación definitiva do Proxecto Industrial Estratéxico (PIE) no Consello da Xunta.
Os membros da directiva da plataforma agradeceron a “cordialidade” no encontro e pediron unha “canle de contacto” co grupo parlamentario popular para seguir trasladando as “preocupacións, inquietudes e demandas” dos veciños afectados polo proxecto da macrocelulosa. Tamén aproveitaron desde Ulloa Viva para lembrarlles aos deputados populares que “hai anos” que solicitaron un encontro coa conselleira de Economía e Industria, María Jesús Lorenzana, “para o que de momento non houbo resposta algunha“. Con respecto ao Grupo Parlamentario do BNG, reuníronse coa plataforma o seu portavoz, Ana Pontón, e o deputado Luís Bará.
PREOCUPACIÓN VECIÑAL
No encontro a plataforma trasladoulle ao BNG o programa de actividades que está a desenvolver de face á mobilización do próximo 14 de decembro. Os deputados nacionalistas analizaron tamén coa Plataforma as últimas noticias ao redor da tramitación do proxecto de Altri en Palas de Rei, e trasladáronlle a preocupación veciñal porque tanto a Xunta como Altri “non desisten de implantar o proxecto”.
Desde o BNG, o deputado Luís Bará explicou a Ulloa Viva que este mércores defenderá unha iniciativa no pleno do Parlamento demandando precisamente o arquivo do proxecto.
O FOCO NA MOBILIZACIÓN DO 14
Tamén mantiveron un encontro cos representantes da Xunta Directiva de Ulloa Viva as deputadas socialistas Lara Méndez e Carmen Rodríguez Dacosta, que expresaron o seu apoio á mobilización convocada por Ulloa Viva e a PDRA para o próximo 14 de decembro e destacaron “os 3 ‘nons'” do Goberno central ao proxecto de Altri. Ao tempo, comprometeron o seu traballo para que, como demandan os veciños, haxa un “non definitivo” á macrocelulosa por parte da Xunta.
O presidente e o tesoureiro da Plataforma, Juan Pedro Sánchez e Serxio Núñez, mantiveron tamén un encontro co deputado de Democracia Ourensá (DO), Armando Ojea, integrante do Grupo Mixto, co que trataron sobre as implicacións do proxecto na provincia de Ourense e a situación actual da tramitación administrativa da macrocelulosa de Altri en Palas de Rei.
Ulloa Viva aproveitou tamén para, como noutras mobilizacións anteriores, convidar a Ojea a que asista o próximo 14 de decembro en Santiago á manifestación prevista.
