O conselleiro de Educación, Ciencia, Universidades e FP, Román Rodríguez, abriu este venres a porta a explorar alternativas ao modelo pactado de descentralización da docencia do grao de Medicina, logo de que a Facultade compostelá rexeitase o acordo que agora analiza o Consello de Goberno da USC.
Rodríguez defendeu que a proposta impulsada pola Xunta e polas tres universidades públicas galegas continúa a ser, ao seu xuízo, “a mellor solución”. Con todo, recoñeceu que o escenario mudou tras o posicionamento da Facultade compostelá, polo que “haberá que avaliar outros escenarios sen restricións” no caso de que non prospere o plan inicial. O conselleiro destacou o traballo previo entre reitorías e administración autonómica e incidiu en que o desacordo actual parte de “problemas internos da USC que deberá canalizar”.
Desde a perspectiva da Xunta, o pacto sobre a reorganización da docencia clínica foi “deseñado e moi traballado” polas tres institucións académicas, con “moito esforzo” por parte de reitores e conselleiros. Por iso, Rodríguez expresou o seu desexo de que o modelo acorde finalmente avance, malia tratarse dunha “situación complexa, con intereses contrapostos” que dificulta un consenso total.
Nun acto celebrado na Coruña, tamén se pronunciou o reitor da Universidade da Coruña, Ricardo Cao, quen evitou valorar o conflito mentres non haxa unha resolución oficial na USC. Lembrou, iso si, que tanto a UDC como Docencia Clínica xa ratificaron por unanimidade o acordo. “Hai que esperar as decisións”, limitouse a responder, evitando entrar en consideracións sobre o debate interno da universidade compostelá.
