O túnel do Hórreo permaneceu pechado ao tráfico aproximadamente desde as 23:00 horas deste mércores ata as 08:00 horas deste xoves, pola falta de persoal de vixilancia na Sala de Pantallas. Así o confirmaron fontes do Goberno local consultadas por Europa Press. Nun comunicado, explicaron que o policía da quenda de noite comunicou a súa baixa polo falecemento dun familiar a última hora da mañá deste mércores, e a xefatura da Policía Local “non conseguiu reordenar as quendas para cubrir esa baixa”.
Segundo expuxeron, ante a negativa da Policía Local a realizar horas extras voluntarias, asinouse un decreto de obrigatoriedade, pero a persoa destinataria “non recolleu a notificación”. Neste contexto, o Executivo municipal subliñou que o traballo de vixilancia do túnel do Hórreo “non pode ser asumido por calquera efectivo” da Policía Local, senón que “require dunha formación específica que na actualidade teñen acreditada 11 policías e dúas delas atópanse de baixa”. Así mesmo, sinalaron que o departamento de Convivencia deu as “indicacións oportunas” para reorganizar as quendas co obxectivo de que “non se repita a situación vivida este mércores”.
“ALGO GRAVÍSIMO”
Este suceso foi denunciado durante o Pleno ordinario deste xoves polo grupo popular, os socialistas e concelleiras non adscritas. “Goretti Sanmartín é unha neglixente porque é a primeira alcaldesa que deixa inactivo o parque comarcal de bombeiros e que ten que pechar túnel do hórreo por falta de policías”, salientou o portavoz do PP local, Borja Verea. Na súa intervención, Verea autopreguntouse “que máis ten que pasar” subliñando que a “realidade supera a ficción”, tras o peche do túnel por falta de policías locais. “Non sodes conscientes do seu estrepitoso fracaso e neglixencia”, remarcou.
Pola súa banda, o portavoz dos non adscritos, Gonzalo Muíños, criticou que se o túnel do Hórreo tivese que ser pechado de día “colapsaría toda a cidade” porque por aí pasan “30.000 coches diariamente”. Neste sentido, a concelleira do Grupo Municipal Socialista Marta Abad cualificou este feito como “algo gravísimo”, e reclamou ao Goberno municipal que se “poña a suar a camiseta de verdade”. “Reclamamos novamente á alcaldesa que asuma o mando e que se poña ao choio para resolver unha situación que, sendo conscientes da súa complexidade, era evitable“, concluíu.
Finalmente, o concelleiro de Economía e Facenda, Manuel César Vila, expuxo que o túnel do Hórreo é unha infraestrutura cuxo funcionamento require unhas esixencias técnicas “importantes”, que non todos os policías teñen para poder estar na sala de pantallas. “A consecuencia de non poder substituír ao policía encargado decidiuse por responsabilidade pechar o túnel”, indicou.
