O Consello de Goberno da Universidade de Santiago de Compostela celebra este venres unha sesión na que estará presente o rexeitamento da Facultade de Medicina ao acordo de descentralización da docencia do grao. A iniciativa, promovida polas tres universidades públicas galegas e avalada tanto por Docencia Clínica como pola UDC, afronta desde hai días unha contestación crecente no propio ámbito compostelán, con posicionamentos críticos de estudantes e das candidatas ao Reitorado da USC.
O debate chega ao órgano de goberno despois de que o reitor, Antonio López, enviase o luns unha comunicación á comunidade universitaria expresando a súa “frustración” pola negativa da Facultade. No escrito, o mandatario sostivo que tanto o centro como os departamentos implicados “foron debidamente informados” dun proceso que cualificou de “longo e complexo”, e vincula a súa postura a unha “visión de país” e á defensa dunha estrutura única para os estudos de medicina en Galicia. Advertiu tamén dunha “oportunidade perdida” que, ao seu xuízo, achega o risco dunha futura fragmentación dos estudos.
A posición da Facultade de Medicina fíxose pública horas antes, nun documento no que cualifica o acordo de “inapropiado” na súa formulación actual e reclama unha modificación “substancial” antes de que poida contar co seu apoio. O centro alerta de que o modelo pactado pode sentar “un precedente grave” para o sistema universitario galego ao permitir estruturas negociadas fóra de criterios académicos, co risco de alterar a planificación global da universidade pública.
Entre as cuestións que propoñen revisar está a definición concreta das unidades docentes descentralizadas, as súas competencias e o seu encaixe na organización académica da USC. Solicitan tamén unha avaliación detallada do impacto docente, asistencial, investigador e económico, así como das consecuencias en materia de equidade e mobilidade do estudantado. Outro dos puntos críticos é o calendario de implantación previsto inicialmente —co comezo da docencia teórica descentralizada en 2027-2028—, que consideran prematuro por afectar a materias dun plan xa en extinción. A alternativa que propoñen atrasa os cambios ata 2029-2030 e 2030-2031, co obxectivo de evitar duplicidades e garantir que ningún estudante actual sexa derivado fóra de Santiago.
A Facultade reclama igualmente unha revisión da adscrición do profesorado, advertindo de que a participación dun 50% de persoal alleo á USC sería un feito sen precedentes e afectaría á coherencia académica e ao control de calidade. Insisten, ademais, na necesidade de que todas as unidades docentes descentralizadas dependan de maneira directa da Facultade de Medicina compostelá, que non se produza ningún traslado obrigatorio de alumnado e que se asegure a presenza do estudantado na Comisión de Seguimento.
Outro dos puntos destacados é a preocupación ante unha posible proliferación de centros. Por iso propoñen introducir unha cláusula que impida que as unidades docentes poidan derivar en futuras solicitudes para crear novas facultades, defendendo que “Galicia non necesita máis facultades”, senón consolidar a estrutura existente. Reclaman tamén retirar a referencia dos anexos na que se fala de avaliar “novas propostas de descentralización” antes de rematar o convenio.
No medio deste debate, as consellerías de Sanidade e Educación, Ciencia, Universidades e FP, representadas por Antonio Gómez Caamaño e Román Rodríguez, reiteraron o seu apoio ao acordo e fixeron un chamamento a analizar a proposta “con altura de miras”, defendendo que supón un avance para as universidades galegas, para o estudantado e para o sistema sanitario. Coas posicións enfrontadas sobre a mesa, o Consello de Goberno da USC afronta unha xornada clave para o futuro inmediato da proposta.
