A Universidade de Santiago de Compostela (USC) consolidou este curso un avance significativo no uso do galego na docencia, segundo o Informe sobre o Uso do Galego elaborado polo Servizo de Normalización Lingüística. O documento recolle que a porcentaxe de clases impartidas nesta lingua alcanza xa o 29,2%, a cifra máis alta de toda a serie histórica e que rompe coa etapa de estancamento dos anos anteriores.
O incremento prodúcese de maneira continuada nos dous últimos cursos e supón, segundo os datos manexados pola USC, máis de 20.000 horas adicionais de docencia en galego, un 19% máis que no período académico precedente. A universidade apunta a varias causas que poderían explicar esta evolución, entre elas o novo sistema de incentivos docentes, polo que o profesorado a tempo completo e o persoal substituto recibe un recoñecemento de 0,2 horas lectivas equivalentes (HDE) por cada hora impartida en galego. A medida entrou en vigor este mesmo curso.
A distribución por campus mostra diferenzas relevantes. No de Lugo, o galego é habitual en 39,3% das horas lectivas, mentres que no de Santiago a presenza sitúase no 27,4%, aínda que tamén en crecemento. Desde a USC subliñan que estes datos permiten que case o 40% do alumnado curse estudos en centros onde o galego é xa a lingua maioritaria da docencia.
As áreas de coñecemento tamén presentan comportamentos desiguais. O informe destaca o peso do galego en titulacións das Ciencias Sociais e Xurídicas, especialmente en Pedagoxía (96%), Educación Social (93%) e Xornalismo (85%). Pola contra, as ensinanzas vinculadas ás Ciencias da Saúde continúan cunha presenza moi reducida: Medicina (3%), Odontoloxía (6%) e Enfermaría en Santiago (13%) sitúanse nos niveis máis baixos de uso.
