O arcebispo de Santiago, Francisco José Prieto, fixo este luns un chamamento á colaboración institucional na atención e integración dos menores migrantes que chegan ao Estado. O prelado apelou á necesidade de “deixar as lexítimas diferenzas políticas” e traballar desde unha “acción conxunta” que poña no centro a dignidade das persoas.
Durante unha comparecencia ante os medios en Santiago, Prieto insistiu en que a acollida destes mozos debe ir acompañada dun compromiso real de inserción. “Hai que ser conscientes do que supón a acollida e a inserción; temos que buscar unha acción conxunta onde non se mesture a necesidade de acoller”, afirmou, advertindo de que a resposta non pode verse condicionada pola confrontación partidaria.
O arcebispo defendeu que os menores migrantes acollidos polas diferentes comunidades autónomas deben ser “integrados e formados”, de maneira que, ao chegar á idade adulta, conten con oportunidades para “ser parte activa da sociedade”.
Prieto recoñeceu a existencia dun “debate moi polarizado” sobre esta cuestión, mais insistiu en que “cando se trata de persoas e menores falamos dunha dignidade que ten que ser respectada”. Nese sentido, apelou ao entendemento entre administracións e entidades sociais, e lamentou as tensións que “afectan ás persoas e ao seu contorno”.
“Non se trata de botar balóns fóra, senón de non xogalos alí onde poden facer máis dano de queirámolo remediar”, concluíu o arcebispo, quen tamén destacou o papel da Igrexa compostelá na colaboración en programas de acollida e acompañamento.
