O Concello de Santiago concedeu ao Arcebispado de Santiago a licenza para acometer a restauración e rehabilitación integral da Torre do Reloxo, un dos elementos máis recoñecibles da Catedral compostelá. O orzamento de execución material ascende a 1.705.504,96 euros e o proxecto foi redactado polos arquitectos Óscar e Iván Andrés Quintela.
A intervención abranguerá a restauración da fábrica pétrea, tanto exterior como interior, a recuperación das pinturasque decoran as esferas do reloxo e os zócalos interiores, e a rehabilitación do espazo interior co obxectivo de facilitar o acceso a todos os niveis da torre. Tamén se construirá unha nova estrutura de madeira destinada a soster a campá principal, un dos elementos máis simbólicos do conxunto catedralicio.
O proxecto forma parte do Plan director da Catedral de Santiago, aprobado pola Xunta de Goberno Local o 27 de outubro de 2009, e conta cos informes favorables da Dirección Xeral de Patrimonio Cultural e da Comisión Asesora do Patrimonio Histórico no marco do Plan especial PE-1, que regula as intervencións no recinto histórico compostelán.
