A Universidade de Santiago (USC) desenvolveu unha ferramenta educativa, chamada e-SoundWay, para aprender a pronuncia e a fonética inglesa a través da experiencia do Camiño de Santiago. Tal e como trasladou a institución nunha nota de prensa, o proxecto, no que participa a profesora da USC María de los Ángeles Gómez González nace ao redor da Ruta Xacobea, concibido “como un espazo simbólico e cultural que combina tradición e innovación”.
Nesta liña, permite profundar, ao longo de 34 etapas con retos ou pequenos xogos en lugares, datos históricos, lendas do Camiño, ou peregrinos de distintas épocas que contribúen a que o usuario se familiarice con diversos acentos do inglés. Tamén, inclúe un manual trilingüe, un laboratorio multimedia en liña e un código QR con acceso a dúas versións do xogo: The Route e FreeRoaming.
Ademais, a aplicación incorpora a participación de peregrinos e especialistas contemporáneos como Antón Pombo, Laurie Dennett, Kate Long, Rebekah Scott ou Noel Braun, e a inclusión de figuras históricas vinculadas á tradición xacobea, entre elas John Rutherford, George Borrow, Annette Meaking e Margery Kempe.
Esta iniciativa é froito de dous proxectos de investigación financiados pola Axencia Estatal de Investigación, e desenvolvido pola USC e a Universidade de Vigo (UVigo), en colaboración con institucións e entidades como University College London, Luar na Lubre, Resonet, ARASAAC (Centro Aragonés para a Comunicación Aumentativa e Alternativa) ou Fresh Caricatures, entre outras.
