Un equipo de médicos de Atención Primaria do Hospital Clínico Universitario de Santiago (CHUS), pertencentes ao grupo Metodoloxía da Investigación do Instituto de Investigación Sanitaria de Santiago (IDIS), en colaboración con bioestadísticos das universidades de Santiago e Harvard, publicou un estudo pioneiro na revista JAMA Network Open que achega novas probas sobre o impacto da alimentación na saúde metabólica da poboación xeral.
Baixo o título ‘Idade, sexo, IMC, horario das comidas e respostas glucémicas reais á carga glucémica das comidas’, a investigación avaliou o comportamento da glicosa en 514 adultos da Estrada (Pontevedra), rexistrando máis de 1,3 millóns de medicións mediante sistemas de monitorización continua de glicosa. O IDIS destaca que se trata “dun dos estudos máis amplos realizados en persoas sen diabetes” con este tipo de tecnoloxía.
Os resultados evidencian que as comidas cunha maior carga glucémica —é dicir, aquelas que combinan maior cantidade e tipo de carbohidratos— producen subidas máis intensas e prolongadas de glicosa, sobre todo ao mediodía e pola noite. Segundo os coordinadores principais do proxecto, Mar Calvo e Francisco Gude, “a través desta investigación confírmase que a carga glucémica é un predictor válido da resposta glucémica en condicións de vida cotiá, máis aló das contornas de laboratorio”.
Os autores salientan que estas conclusións poderían orientar novas recomendacións dietéticas personalizadas, adaptadas non só á composición dos alimentos, senón tamén ao momento do día en que se consumen e ás características individuais de cada persoa. Deste modo, a investigación realizada en Santiago abre a porta a estratexias preventivas máis precisas fronte a enfermidades metabólicas, con potencial aplicación na práctica clínica e na saúde pública.
