O catedrático de Edafoloxía e Química Agrícola da USC, Agustín Merino, coordina a participación galega nesta iniciativa, desenvolvida no marco do programa de doutoramento en Agricultura e Medio Ambiente para o Desenvolvemento. O investigador advertiu que a situación actual de degradación “non só ameaza a seguridade alimentaria local e a calidade dos recursos hídricos, senón que tamén pode afectar o abastecemento de auga para o funcionamento da Canle de Panamá, unha infraestrutura vital para o comercio global”.
O proxecto leva por título ‘Fortalecemento de capacidades para restaurar sós degradados na rexión oeste do Canle de Panamá’, está coordinado polo Instituto de Investigación Agropecuaria de Panamá (IDIAP) e conta con financiamento da Axencia Española de Cooperación Internacional para o Desenvolvemento (AECID). Tamén participa o Instituto de Solos de Cuba, o que dá lugar a un consorcio internacional no que a USC achega coñecemento científico e persoal investigador.
Un dos piares da actuación será a creación de parcelas de demostración, concebidas como laboratorios vivos nos que se implican directamente agricultores de piña e café, gandeiros, asociacións de mulleres, colectivos de mocidade ambientalista, así como institucións como a Autoridade da Canle de Panamá e o Ministerio de Agricultura do país. Nestes espazos combinaranse técnicas avanzadas de conservación coa sabedoría tradicional das comunidades locais.
O programa prevé a realización de encontros multiactores, prácticas de campo para a transferencia de tecnoloxía e obradoiros formativos de carácter multidisciplinar. Todo isto busca favorecer un diálogo fluído entre ciencia e sociedade para mellorar a xestión do solo e garantir a súa recuperación a longo prazo.
