A alcaldesa de Santiago, Goretti Sanmartín, confirmou este luns a incorporación dunha persoa eventual para asumir as tarefas de protocolo municipal, á espera de que se cree formalmente un posto específico dentro da estrutura do Concello.
A decisión chega tras a dimisión da anterior responsable de protocolo a finais de xullo, apenas dúas semanas despois de que a rexedora sinalase directamente ao seu departamento pola “falta de contraste” respecto á súa asistencia ao acto de entrega da Medalla de Galicia a Leonor.
Segundo explicou Sanmartín, actualmente non existe no cadro de persoal unha praza regulada nin unha denominación formal de posto de protocolo, polo que estas funcións foron historicamente desempeñadas por persoal eventual vinculado a grupos de goberno.
A nova incorporación, ligada ao grupo municipal do BNG, comezou o 1 de setembro e conta con formación en relacións internacionais e diplomáticas, ademais de experiencia en diferentes ámbitos laborais, entre eles a Xunta de Galicia e medios de comunicación. A alcaldesa matizou que este nomeamento non responde a un perfil técnico en estudos de protocolo, xa que esa praza “aínda non foi creada oficialmente”.
Sanmartín avanzou que nos vindeiros meses se iniciará o procedemento para incorporar o posto á oferta pública de emprego municipal, co obxectivo de establecer un perfil técnico definido. Entre as opcións que se barallan, indicou, está a creación directa da praza ou un período previo de interinaxe, sendo esta última a alternativa máis probable.
A rexedora destacou que se buscará un proceso “áxil” para dotar o Concello dun servizo de protocolo estable e profesionalizado, coa intención de reforzar a organización e representación institucional do consistorio.
