Un menor tivo que ser trasladado ao hospital este martes debido ás feridas sufridas no transcurso dunha pelexa cun compañeiro de clase ás inmediacións do instituto Antonio Fraguas, no barrio compostelán de Fontiñas.
En concreto, os dous mozos encerelláronse nunha pelexa sobre as 15,00 horas, despois da súa saída do centro educativo. Nun momento dado, un deles empuxou ao outro, que caeu sobre un cristal, producíndose varios cortes, polos que tivo que ser asistido.
Segundo confirmaron a Europa Press fontes de Educación, ata a pelexa non constaban queixas ou denuncias en relación a acoso escolar. Con todo, a dirección do centro no que estudan ambos os mozos xa está en contacto coas familias para tomar as medidas precisas ou activar un protocolo de acoso se se considera necesario.
