A Xunta de Galicia confirmou a recepción de catro ofertas para a redacción do Proxecto de Interese Autonómico (PIA) destinado a dotar de novos aparcadoiros ao Hospital Clínico de Santiago (CHUS) e mellorar os accesos ao complexo sanitario.
Segundo informou o executivo galego, tres das propostas presentadas corresponden a Unións Temporais de Empresas (UTE), o que eleva a participación total a nove compañías. O contrato, cun importe de 2,7 millóns de euros, establece que o documento definitivo do PIA deberá estar entregado nun prazo de 12 meses desde a súa formalización.
De maneira paralela, avanzarán os proxectos de execución do aparcadoiro no heliporto, a urbanización da conexión coa Choupana, a mellora do viario de acceso e o desenvolvemento dos distintos aparcadoiros previstos no plan. Estes traballos tomaranse como referencia en documentos técnicos xa elaborados pola Xunta, como o estudo de mobilidade e aparcadoiro ou o estudo previo de mellora de accesos ao CHUS, así como nas achegas do Concello de Santiago.
As actuacións enmárcanse no convenio de colaboración asinado en agosto de 2024 entre varias consellerías —Vivenda e Planificación de Infraestruturas, Sanidade e Medio Ambiente— e o Concello.
O acordo establece que a Xunta asumirá o 90% dos custos de ordenación do ámbito hospitalario e os accesos, financiando o 80% das obras e achegando ademais 3,5 millóns de euros a proxectos municipais de saneamento e abastecemento. Pola súa banda, o Concello de Santiago comprométese a cubrir o 20% restante e aplicará unha bonificación do 95% no imposto de construcións, obras e instalacións derivadas das actuacións do Sergas vinculadas ao convenio.
