O Centro Singular de Investigación en Química Biolóxica e Materiais Moleculares da Universidade de Santiago (CiQUS) deu a coñecer un avance que abre novas vías no campo da biotecnoloxía: a creación de microgotas sintéticas capaces de imitar funcións esenciais das células vivas.
Segundo informou o centro, estas partículas combinan dous trazos característicos das células naturais: un interior densamente concentrado e unha membrana protectora e permeable que regula o intercambio co exterior. O segredo está no uso de dendrímeros, polímeros sintéticos con estrutura ramificada que lles confiren unha estabilidade moi superior á doutros modelos artificiais.
O director do estudo, Eduardo Fernández, explicou que o equipo logrou que as microgotas manteñan a súa integridade “en ambientes con elevadas concentracións de sal, onde os coacervados convencionais se desestabilizan”. Ademais, estas estruturas foron quen de encapsular proteínas de forma selectiva, facilitar reaccións encimáticas en fervenza e establecer procesos de comunicación química, reproducindo fenómenos propios das células vivas.
Outro dos achados destacados é a súa capacidade para interactuar con células naturais mediante mecanismos de transdución de sinais, un comportamento que as converte en candidatas prometedoras para aplicacións en medicina rexenerativa, terapias dirixidas e construción de tecidos artificiais.
O traballo foi publicado na revista Journal of the American Chemical Society (JACS) baixo o título ‘Dendritic Membranized Coacervate Microdroplets: A Robust Platform for Synthetic-Living Cell Consortia‘.
