A alcaldesa de Santiago, Goretti Sanmartín, apelou hoxe á importancia de poñer o foco na prevención para que “os incendios non sexan unha realidade”. Fixoo en declaracións aos medios no medio da vaga de lumes que afecta á provincia de Ourense, onde nas últimas xornadas arderon centos de hectáreas.
Sanmartín describiu a situación como “dramática” e vinculouna a “múltiples causas de ordenación do territorio e de falta de proxectos para que o rural sexa vivo, dinámico e haxa un monte multifuncional”. Nesa liña, apuntou á Xunta de Galicia como administración que debe “marcar o camiño” e impulsar cambios nas políticas forestais.
No caso da capital galega, a rexedora lembrou que en agosto rexistráronse pequenos incendios en número superior aos do mesmo mes de 2024. Segundo explicou, todos puideron ser controlados polos servizos municipais, e agradeceu o labor do corpo de bombeiros de Santiago, que cualificou de “bo servizo”.
“Creo que temos que estar en alerta continua”, advertiu Sanmartín, ao tempo que insistiu en que “hai que fixarse máis non tanto en como extinguir os incendios, senón en como facer prevención”. A alcaldesa confiou en que a cidade poida seguir facendo fronte aos lumes menores, mais advertiu que a clave pasa por evitar a súa aparición.
