O Diario Oficial de Galicia (DOG) publica este venres o anuncio da aprobación inicial do Plan especial de infraestruturas e dotacións dun centro de hípica na Pedra, no municipio coruñés de Teo.
Segundo se recolle no DOG, a resolución da Alcaldía do 21 de maio de 2025 aprobou inicialmente este plan especial. Así, suspéndese o procedemento de outorgamento de licenzas de parcelación de terreos, edificación e demolición no ámbito do citado plan.
A duración da suspensión, detalla o anuncio, é de dous anos, contados desde a aprobación inicial, extinguíndose en todo caso coa súa aprobación definitiva.
A área afectada pola suspensión localízase ao norte do núcleo da Pedra, na parroquia de Recesende (San Xoán), cunha superficie de 18.587,95 metros cadrados, segundo despréndese do proceso de validación e inscrición levado a cabo.
Agora sométese o expediente a información pública durante o prazo de dous meses mediante a publicación deste anuncio no Diario Oficial de Galicia, en La Voz de Galicia, no taboleiro de edictos do Concello e no Boletín Oficial do Estado.
Durante ese prazo, que se computará a partir do día seguinte desta publicación, poderán presentarse alegacións, suxestións ou documentos que se consideren oportunos en relación co instrumento ou o expediente sometido a información pública.
